Júlía Fylgitungl Úranusar

Júlía er sjötta innsta þekkta tungl Úranusar. Braut þess liggur í aðeins 64.358 km fjarlægð frá Úranusi. Tunglið fann stjörnufræðingurinn Stephen Synnott á myndum Voyagers 2 sem teknar voru 3. janúar 1986 og hlaut þá tímabundna heitið S/1986 U2. Júlía er nefnd eftir kvenhetjunni í leikritinu Rómeó og Júlía eftir William Shakespeare.

Júlía tilheyrir Portía-tunglahópnum sem inniheldur einnig tunglin Bíönku, Kressídu, Desdemónu, Portíu, Rósalind, Kúpid, Belindu og Perdítu.. Öll þessi tungl hafa svipaðar brautir, eru álíka stór og dauf. Júlía er afar smávaxið tungl, aðeins um 93 km í þvermál og endurvarpar aðeins um 7-8% af sólarljósinu sem fellur á það. Það er því mjög dökkt. Sýndarbirtustig tunglsins er aðeins +20,6 og er svo smátt að það sést aðeins í stærstu stjörnusjónaukum jarðar. Á myndum Voyagers 2 virðist Júlía ílangt fyrirbæri og yfirborðið gráleitt. Mjög lítið annað er vitað um það.

Tölulegar upplýsingar

Heimildir:

• The Nine Planets.org
• NASA Solar System Exploration
• SolarViews.com