Rósalind er áttunda innsta þekkta tungl Úranusar. Braut þess liggur í aðeins 69.926 km fjarlægð frá Úranusi. Tunglið fann stjörnufræðingurinn Stephen Synnott á myndum Voyagers 2 sem teknar voru 13. janúar 1986 og hlaut þá tímabundna heitið S/1986 U4. Rósalind er nefnd eftir dóttur eldri hertogans í leikritinu Sem yður þóknast eftir William Shakespeare.

Rósalind tilheyrir Portía-tunglhópnum sem inniheldur einnig tunglin Bíönku, Kressídu, Desdemónu, Júlíu, Portíu, Kúpid, Belindu og Perdítu.. Öll þessi tungl eru á svipuðum brautum, eru álíka stór og dauf. Rósalind er afar smávaxið tungl, aðeins um 72 km í þvermál og endurvarpar aðeins um 7-8% af sólarljósinu sem fellur á það. Það er því mjög dökkt. Sýndarbirtustig tunglsins er aðeins +21,3 og er svo smátt að það sést aðeins í stærstu stjörnusjónaukum jarðar. Á myndum Voyagers 2 virðist Rósalind ílangt fyrirbæri og yfirborðið gráleitt. Mjög lítið annað er vitað um það.

Tölulegar upplýsingar

Heimildir:

• The Nine Planets.org
• NASA Solar System Exploration
• SolarViews.com