 | Fylgitungl Úranusar |
Umhverfis Úranus ganga 27 þekkt tungl. Af þeim eru fimm nokkuð stór og hnöttótt en flest afar smá með óreglulega lögun.
William Herschel uppgötvaði fyrstu tvö tunglin umhverfis Úranus árið 1787, þau Óberon og Títaníu. Nafni hans William Lassell, sá sem uppgötvaði Tríton umhverfis Neptúnus, uppgötvaði önnur tvö, þau Aríel og Úmbríel. Nærri öld síðar fann Gerard Kuiper Míröndu árið 1948.
Þegar Voyager 2 flaug framhjá Úranusi árið 1986 þrefaldaðist tunglafjöldinn. Voyager 2 fann tíu tungl sem eru milli 26 og 154 km að þvermáli, þau Júlíu, Pukk, Kordelíu, Ófelíu, Bíönku, Desdemónu, Portíu, Rósalindu, Kressídu og Belindu. Öll innstu tungl Úranusar, þau sem Voyager fann, virðast úr blöndu íss og bergs. Samsetning tunglanna utan brautar Óberons er óþekkt en líklega eru þau smástirni sem Úranus fangaði.
Eftir heimsókn Voyagers hafa stjörnufræðingar fundið tólf tungl til viðbótar eftir athuganir frá jörðinni. Öll þessi tungl eru enn smærri en þau sem Voyager fann eða milli 10 og 16 km að þvermáli og mjög dökkleit.
Míranda, innsta og smæsta tunglið af þeim fimm stærstu, hefur afar einkennilegt yfirborð sem er mjög ólíkt öllum oðrum í sólkerfinu. Svo virðist sem tunglið hafi brotnað upp og hnoðast einhvern veginn saman aftur. Þar er fjöldi gíga, stórgerð lagskiptin og landslag sem virðist annað hvort ævafornt eða frekar ungt.
Nöfn
Tungl Úranusar eru nefnd eftir persónum úr verkum ensku skáldanna William Shakespeare og Alexanders Pope. Þessa nafnahefð má rekja til John Herschel, sonar Williams Herschel, sem árið 1852 stakk upp á þessum nöfnum að áeggjan Williams Lassell sem hafði uppgötvað Aríel og Úmbríel árið áður. Lassell hafði fyrr haldið í heiðri nafnahefð Herschels sjálfs fyrir þau sjö tungl Satúrnusar sem þá þekktust. Árið 1848 hafði Lassell nefnt áttunda Satúrnusartunglið sem hann fann Hýperíon, samkvæmt nafnahefð Herschel.Tafla yfir fylgitungl Úranusar
| Röð | Tungl nr. | Heiti: | Þvermál (km): | Fjarlægð (km): | Umferðartími (dagar): | Uppgötvað af | Uppgötvað árið |
| 1 | VI | Kordelía | 40 | 50.000 | 0,3 | Voyager 2 | 1986 |
| 2 | VII | Ófelía | 42 | 54.000 | 0,4 | Voyager 2 | 1986 |
| 3 | VIII | Bíanka | 51 | 60.000 | 0,4 | Voyager 2 | 1986 |
| 4 | IX | Kressída | 80 | 62.000 | 0,5 | Voyager 2 | 1986 |
| 5 | X | Desdemóna | 64 | 63.000 | 0,5 | Voyager 2 | 1986 |
| 6 | XI | Júlía | 93 | 64.000 | 0,5 | Voyager 2 | 1986 |
| 7 | XII | Portía | 135 | 66.000 | 0,5 | Voyager 2 | 1986 |
| 8 | XIII | Rósalind | 72 | 70.000 | 0,6 | Voyager 2 | 1986 |
| 9 | XXVII | Kúpid | 10 | 74.800 | 0,6 | Hubblessjónaukinn | 2003 |
| 10 | XIV | Belinda | 80 | 75.000 | 0,6 | Voyager 2 | 1986 |
| 11 | XXV | Perdíta | 20 | 76.500 | 0,6 | Voyager 2 | 1986 |
| 12 | XV | Puck | 162 | 86.000 | 0,8 | Voyager 2 | 1985 |
| 13 | XXVI | Mab | 10 | 98.000 | 0,9 | Hubblessjónaukinn | 2003 |
| 14 | V | Míranda | 471 | 129.390 | 1,4 | Gerard Kuiper | 1948 |
| 15 | I | Aríel | 1158 | 191.020 | 2,5 | William Lassell | 1851 |
| 16 | II | Úmbríel | 1169 | 266.300 | 4,1 | William Lassell | 1851 |
| 17 | III | Títanía | 1578 | 435.910 | 8,7 | William Herschel | 1787 |
| 18 | IV | Óberon | 1522 | 583.520 | 13 | William Herschel | 1787 |
| 19 | XXII | Fransiskó | 22 | 4.276.000 | 267 | Holman, Gladman o.fl. | 2001 |
| 20 | XVI | Kalíban | 72 | 7.231.000 | 580 | Gladman o.fl. | 1997 |
| 21 | XX | Stefanó | 32 | 8.004.000 | 677 | Gladman o.fl. | 1999 |
| 22 | XXI | Trinkúló | 18 | 8.504.000 | 748 | Holman o.fl. | 2001 |
| 23 | XVII | Sýkórax | 150 | 12.179.000 | 1286 | Gladman o.fl. | 1997 |
| 24 | XXIII | Margrét | 20 | 14.345.000 | 1697 | Sheppard og Jewitt | 2003 |
| 25 | XVIII | Prosperó | 50 | 16.256.000 | 1978 | Holman, Gladman o.fl. | 1999 |
| 26 | XIX | Setebos | 47 | 17.418.000 | 2228 | Kavelaars o.fl. | 1999 |
| 27 | XXIV | Ferdínand | 21 | 20.901.000 | 2792 | Holman, Gladman o.fl. | 2001 |