Orðið „alheimur“ er stórt orð. í sínum víðasta skilningi nær hugtakið yfir allt sem til er í heiminum. Málið fer þó að vandast þegar vangaveltur vakna um hvort til séu aðrir „alheimar“.

Í þessum hluta vefsins lítum við út fyrir sólkerfið og svipumst um í himingeimnum. Fyrst verða á vegi okkar aðrar sólir og gasský í Vetrarbrautinni. Utan hennar finnum við síðan um það bil hundrað milljarða annarra vetrarbrauta. Þetta er eins og að horfa aftur í tímann því ljósið frá fjarlægum vetrarbrautum hefur verið milljónir og jafnvel milljarða ára á leiðinni til okkar. Þegar við skyggnumst nógu langt út í alheiminn sjáum við hann eins og hann var í bernsku fyrir um 14 milljörðum ára.

Ævi og örlög sólstjarna

Allar stjörnur hefja ævi sína í gasskýi en síðan fer hver sína leið. Þær massamestu lifa fjörugu lífi og brenna út á fáeinum milljónum ára en þær minnstu lifa rólegu lífi í milljarða ára. Stóru stjörnurnar enda að lokum ævi sína með hvelli í stjörnusprengingu og skilja eftir sig nifteindastjörnu eða svarthol.

Vetrarbrautir - stórar og smáar

Heimkynni okkar eru í Vetrarbrautinni sem er ein af ótal mörgum stjörnuþokum sem finna má í alheiminum. Þær eru þó ekki einsleitur hópur heldur eru þær til af ýmsum stærðum og gerðum. Vetrarbrautaþyrpingar eru stærstu byggingareiningar alheimsins og í einni slíkri má finna þúsundir ólíkra vetrarbrauta.

Saga heimsins

Alheimurinn hóf ævi sína með miklum hvelli fyrir um 14 milljörðum ára. Síðan þá hefur hann þanist út með ógnarhraða og virðist sem hraði útþenslunnar fari vaxandi.